Rousseau in 1753, by Maurice Quentin de La Tour
Jean Jacques Rousseau(1712-1778)
លោកJean Jacques Rousseau ជាទស្សនៈវិទូ ជាអ្នកទ្រឹស្តីនយោបាយនិងជាអ្នកក្រមសីលធម៍ ជនជាតិបារាំង។ លោក Rousseau បានមានប្រសាសន៍ថា Man is born free, yet everywhere he is found in chains។ ដោយសារនៅពេលនោះប្រជាជនជាច្រើននៅទ្វិបអឺរ៉ុបរស់នៅក្រោមរដ្ឋាភិបាល ជិះជាន់។ ប្រជាជនមានសិទ្ធិកំណត់អ្វីដែលពួកគេគួរត្រូវបានដឹកនាំពីព្រោះមនុស្សនៅក្នុងសភាព ធម្មជាតិកើតមកដោយសេរី។ ភារកិច្ចរបស់រដ្ឋាភិបាលគឺត្រូវរក្សាសេរីភាពរបស់ប្រជាជន។
ទស្សនៈរបស់ Rousseau ចំពោះសភាពធម្មជាតិ ( State of nature )
- ក្នុងសភាពធម្មជាតិ គ្មានជម្លោះ គ្មានសង្រ្គាមអចិន្ត្រៃយ៍ទេ និង ជាសភាពមួយដែលមនុស្ស រស់នៅដាច់ឆ្ងាយពីគ្នាតែម្នាក់ឯងៗហើយត្រូវដោះស្រាយបញ្ហាដោយខ្លួនឯង។ត្រង់នេះលោក Rousseau បានបដិសេធគំនិតរបស់លោក Hobbes ដែលយល់ថា ក្នុងសភាពធម្មជាតិមាន តែជម្លោះ សង្រ្គាមហើយអ្នកខ្លាំងមានជ័យជម្នះលើអ្នកខ្សោយ។
- ក្នុងសភាពធម្មជាតិមិនមានការលូតលាស់ និងមិនមានកម្មសិទ្ធិឯកជន។មនុស្សម្នាក់ៗបេះផ្លែ ឈើដែលមិនមែនជារបស់អ្នកណាម្នាក់ឡើយ។ បើគ្មានកម្មសិទ្ធិឯកជន ក៍គ្មានចោរដែរ។
- ក្នុងសភាពធម្មជាតិមនុស្សនិងគ្រួសារអាចធ្វើដំណើរទៅណាមកណាដោយគ្មានព្រំដែនកំណត់ ឡើយ។
- ក្នុងសភាពធម្មជាតិ មនុស្សជាតិមានសេរីភាព ភាពសប្បាយ និង សុភមង្គល។
- នៅក្នុងសភាពធម្មជាតិមនុស្សប្រឈមមុខនឹងគ្រោះធម្មជាតិនិងសត្រូវផងដែរ។
លោក Rousseau គិតថាការរកឃើញផ្នែកកសិកម្មនិងលោហធាតុ បានបង្កើតឲ្យមានកម្មសិទ្ធិ បុគ្គលលើដីធ្លី វិសមភាព ភាពសម្បូរនិងទុរគតភាព ការប្រកួតប្រជែងគ្នា តណ្ហា និង ជម្លោះ។ មនុស្សស្ថិតនៅចំណុះសង្គមព្រោះមនុស្សបានប្រគល់សិទ្ធិនិងសេរីភាពឲ្យសង្គមប៉ុន្តែមនុស្ស នៅតែរក្សាសេរីភាពរបស់ពួកគេព្រោះសង្គមជាសំណុំនៃមនុស្សទាំងអស់គ្នា។សង្គមនយោបាយ ជាអ្នកសង្រ្គោះអ្វីដែលមនុស្សមានកាលពីនៅក្នុងសភាពធម្មជាតិ។
ទស្សនៈរបស់ Rousseau ចំពោះអ្នកតំណាងរាស្រ្ត
លោក Rousseau យល់ថា អធិបតេយ្យរបស់ប្រជាជនស្ថិតនៅជារបស់ប្រជាជន។ អធិបតេយ្យ នេះពុំអាចផ្ទេរទៅឲ្យអ្នកណាម្នាក់បានឡើយ។ ប្រព័ន្ធរាជាធិបតេយ្យពុំអាចទទួលយកបានទេពីព្រោះ ព្រះមហាក្សត្រជាអ្នកកាន់អំណាចរបស់ប្រជារាស្រ្ត។ ប្រជារាស្រ្តជាអ្នកសម្រេចអ្វីៗដោយខ្លួនឯង។ គេអាចប្រតិបត្តិតាមឆន្ទៈរបស់អ្នកណាម្នាក់តែគេពុំអាចតំណាងឲ្យឆន្ទៈអ្នកណាម្នាក់បានឡើយ។ អ្នកតំណាងអាចធ្វើឲ្យប្រជាធិបតេយ្យពីល្អទៅអាក្រក់បានដោយសារអ្នកតំណាងអាចធ្វើអ្វីតាមបំណង របស់ពួកគេមិនមែនតាមបំណងរបស់ប្រជារាស្រ្តឡើយ។ លោក Rousseau បានលើកឡើងថា កាលណាប្រជាជនបោះឆ្នោតហើយគ្មានការធានាចំពោះអ្នកតំណាងទេ នោះប្រជាជនបានលក់ សេរីភាពរបស់ពួកគេហើយ។ ប្រជាជនមានសេរីភាពនៅថ្ងៃដែលពួកគេបោះឆ្នោតជ្រើសរើសអ្នក តំណាង របស់ពួកគេ ប៉ុន្តែចាប់តាំងពីពេលនោះមកប្រជាជនក្លាយជាទាសកររបស់អ្នកដែលពួកគេ ជ្រើសរើស។ អ្នកតំណាងបង្កើតជារបបអប្បជនាធិបតេយ្យ(oligarchy)។
អំណាចបែបតំណាងជាអំណាចបែបទាសភាព។ ចំពោះទម្រង់រដ្ឋ លោក Rousseauមិនអនុញ្ញាត របបគ្រប់គ្រងបែបតំណាងឡើយ តែលោកគាំទ្រការគ្រប់គ្រងបែបប្រជាធិបតេយ្យផ្ទាល់។ របប អប្បជនាធិបតេយ្យ(oligarchy) និង ឯកាធិបតេយ្យ (Monocracy) ជាយុទ្ធសាស្រ្តនយោបាយដែល បង្ហាញថា ស្តេច ឬ អ្នកកាន់អំណាចផ្តាច់ការមួយក្រុមតូចអាចគ្រប់គ្រងប្រជាជនមួយប្រទេស។
លោក Rousseau បានរិះគន់ចំពោះប្រជារាស្រ្តអង់គ្លេសថា ប្រជារាស្រ្តគិចថាខ្លួនឯងមានសេរីភាព នោះជាការយល់ច្រលំធំណាស់។ប្រជារាស្រ្តមានសេរីភាពតែនៅពេលមុនការបោះឆ្នោតជ្រើសរើស សមាជិកសភាតែប៉ុណ្ណោះ។ នៅពេលគេជ្រើសរើសតំណាងរបស់ខ្លួនរួចហើយនោះពួកគេនឹងក្លាយ ជាទាសកររបស់សមាជិកសភា។
ទស្សនៈរបស់លោកRousseau ចំពោះប្រជាធិបតេយ្យ
ដើម្បីរៀបចំរបបនយោបាយមួយដែលធានាសេរីភាពរបស់ប្រជាជន លោក Rousseauបានលើក ឡើងនួវមធ្យោបាយមួយចំនួន។ គោលការណ៍នៃប្រជាធិបតេយ្យគឺប្រជាជនទាំងមូលជាម្ចាស់នៃ អធិបតេយ្យហើយប្រជាជនជាអ្នកប្រើប្រាស់អធិបតេយ្យនោះ។ ប្រជាជនអាចប្រើប្រាស់អធិបតេយ្យ តាមរយៈការបង្កើតច្បាប់។ ច្បាប់ជាប្រភពនៃសេរីភាព ហើយប្រភពនៃច្បាប់គឺជាឆន្ទៈទូទៅរបស់ ប្រជាជនទាំងអស់។ លោក Rousseau បានលើកជាឧទហរណ៍ថា ប្រសិនបើរដ្ឋមួយមានប្រជាពលរដ្ឋ ចំនួន១០០០០នាក់នោះសមាជិកម្នាក់ៗនៃរដ្ឋនោះមានចំណែក១/១០០០០នៃអំណាចកំពូល។ ច្បាប់ជាឆន្ទៈទូទៅរបស់ប្រជាជនទាំងអស់ ដូច្នេះច្បាប់ត្រូវធ្វើឡើងក្នុងគោលដៅទូទៅសម្រាប់ គោលការណ៍ធំៗដែលជាកិច្ចការរបស់រដ្ឋាភិបាល។ ច្បាប់សម្រាប់ប្រជាជនទាំងអស់យកទៅអនុវត្ត។ ច្បាប់តែប្រជាជនមិនបានអនុម័ត ពុំមែនជាច្បាប់ទេហើយបើរាស្រ្តមិនបានអន្តរាគមន៍ដោយផ្ទាល់ យ៉ាងហោចណាស់ក៍មានប្រជាមតិទទួលស្គាល់យល់ព្រមពីប្រជារាស្ត្រដែរ។
លោក Rousseau គិតថាច្បាប់មិនអាចមានគ្រោះថ្នាក់ចំពោះសេរីភាពរបស់បុគ្គលទេព្រោះ ច្បាប់សម្រេចដោយមនុស្សទាំងអស់គ្នាហើយអនុវត្តន៍ចំពោះមនុស្សទាំងអស់គ្នាដូច្នេះមិនមាន បច្ច័យណាមួយដែលមនុស្សទាំងអស់សម្រេចអ្វីមួយដែលឲ្យទោសដល់មនុស្សទាំងអស់នោះទេ។
លោក Rousseau គិតថាអ្នកភាគចិតត្រូវតែគោរពសេចក្តីសម្រេចរបស់អ្នកភាគច្រើន។ ប្រទេស ដែលតូចៗមានប្រជាជនតិចគេអាចអនុវត្តប្រជាធិបតេយ្យដោយផ្ទាល់បានតែប្រទេសដែល មានប្រជាជនយ៉ាងច្រើននោះគេពិតជាពិបាកអនុវត្តប្រព័ន្ធប្រជាធិបតេយ្យដោយផ្ទាល់ណាស់។ ចំពោះបញ្ហានេះលោក Rousseau បានលើកឡើងនុវអនុសាសន៍បច្ចេកទេសមួយចំនួន៖
- ច្បាប់ដែលសំខាន់ៗរបស់រដ្ឋត្រូវតែប្រជារាស្រ្តសម្រេចតាមរយៈការធ្វើប្រជាមតិ
- ចំពោះបញ្ហាដែលមិនសំខាន់គេអាចប្រគល់ឲ្យអ្នកតំណាងរាស្រ្ត។ លោក Rousseau គិតថា តំណាងរាស្រ្តដែលត្រូវបានគេជ្រើសតាំងរយៈពេលយូរ ច្រើនភ្លេចរាស្រ្តដែល ជាអ្នកបោះឆ្នោតឲ្យ។ ប៉ុន្តែចំពោះតំណាងរាស្រ្តដែលជ្រើសរើសសម្រាប់រយៈពេលខ្លីមិនទាន់មានទម្លាប់យកមុខងារជា តំណាងជាមុខរបបនៅឡើយហើយអាចស្ថិតនៅជាតំណាងពតៗ។
- ការជ្រើសរើសអ្នកតំណាងរាស្រ្តត្រូវកម្រិតពេលវាលា ពីព្រោះអ្នកតំណាងរាស្រ្តដែលត្រូវ បានគេជ្រើសរើសច្រើនលើកច្រើនសារ នោះនឹងមានមុខរបបជាអ្នកតំណាងរាស្រ្តជាមិនខាន។
- ត្រូវបង្កើតច្បាប់ដាក់ទោសចំពោះអ្នកតំណាងរាស្រ្តដែលមិនគោរពតាមឆន្ទៈរបស់ប្រជាជន និងមិនបានអនុវត្តតាមកម្មវិធីរបស់ខ្លួន។
នៅពេលដែលច្បាប់ត្រូវបានអនុម័តតាមរយៈមនសិការរបស់ប្រជាពលរដ្ឋទាំងមូលច្បាប់ត្រូវ តែយកទៅអនុវត្តយ៉ាងតឹងរឹងបំផុត។ បើច្បាប់មិនអាចអនុវត្តចំពោះមនុស្សទាំងអស់នោះ មិនមែនប្រជាធិបតេយ្យឡើយ។ រដ្ឋាភិបាលជាអ្នកប្រតិបត្តិច្បាប់ដែលប្រជាជនជាអធិបតី។ អធិបតេយ្យរបស់ប្រជាជនស្ថិតនៅក្នុងអំណាចនិតិបញ្ញត្តិដែលជាអំណាចធ្វើច្បាប់និងលប់ច្បាប់។
របបប្រជាធិបតេយ្យ ជារបបមួយដែលល្អឥតខ្ចោះ ប្រសិនបើរបបនយោបាយ នោះអាចធ្វើឲ្យ អំណាចនិតិបញ្ញត្តិនិងអំណាចប្រតិបត្តិមាន Checks and Balances។ លោក Rousseau យល់ឃើញថា បើប្រជារាស្រ្តមានការយល់ដឹងខ្ពស់ ទើបប្រជាធិបតេយ្យមានដំណើរការទៅល្អ។ រដ្ឋាភិបាលប្រជាធិបតេយ្យជារដ្ឋាភិបាលសម្រាប់ប្រជារាស្រ្តដែលជាបញ្ញាជនមានន័យថាមិនមែន រដ្ឋាភិបាលសម្រាប់មនុស្សឬពលរដ្ឋល្ងង់ទេ។
របបរាជាធិបតេយ្យ អំណចនិតិបញ្ញត្តិត្រូវបានប្រគល់ឲ្យមនុស្សមួយចំនួន ដែលប្រកបដោយ គតិបណ្ឌិត ដែលត្រូវបានជ្រើសតាំងតាមការបោះឆ្នោត។
ស្នាដៃរបស់ដ៍សំខាន់របស់លោក Rousseau គឺកិច្ចសន្យាសង្គម ដែលត្រូវបានសរសេរនៅឆ្នាំ ១៧៦២គឺជាមូលដ្ឋានគ្រឹះនៃទ្រឹស្តីប្រជាធិបតេយ្យ។ ប្រជាធិបតេយ្យនៅសម័យ Rousseau គ្រាន់តែជាការស្រមើលស្រមៃតែប៉ុណ្ណោះពីព្រោះថានៅសម័យនោះគឺជារបបរាជានិយមផ្តាច់ការ កាន់អំណាច។ គេមិននឹកស្មានថាថ្ងៃណាមួយមនុស្សនឹងសម្រេចធ្វើតាមគោលការណ៍របស់លោក Rousseau ទេ។ មុនគាត់សរសេរសៀវភៅគាត់មានចំងល់ថា ហេតុអ្វីបានជាប្រជារាស្រ្តនៅក្នុងរបប រាជាធិបតេយ្យជួបការលំបាកវេទនា?តើអ្វីដែលនាំឲ្យអ្នកទាំងនោះវេទនា?ហើយត្រូវធ្វើដូចម្តេចដើម្បី ដោះស្រាយបញ្ហាទាំងនោះ? ប៉ុន្តែបច្ចុប្បន្នអ្វីដែលជាបញ្ហាទាំងនោះត្រូវបានដោះស្រាយហើយប្រជាជន នៅទ្វីបអឺរ៉ុបទាំងមូលរស់នៅក្នុងជីវភាពធូរធារសម្បូររុងរឿងនិងសុខសុភមង្គលដោយសារប្រជាជននៃ ប្រទេសទាំងនោះក្លាយជាម្ចាស់នៃប្រទេសពិតប្រាកដ។
References:
MILLER, ROGER LEROY. NTC’s American Goverment. Illinios: National Text Book Company, 1999.
ឈុន ណារ៉េត. ប្រវត្តិគំនិតនយោបាយនិងទ្រឹស្តីរដ្ឋ. ភ្នំពេញ: សុខលាភ, ២០០៨.